August 20, 2025 | 12:00am
MANILA, Philippines — Inisnab ng walong contractors ang pagdinig ng Senate Blue Ribbon Committe nitong Martes tungkol sa mga palpak na flood control projects.
Sa 15 contrators na pinadalhan ng imbitasyon, pito lamang ang dumalo kung saan mismong may-ari ang humarap at ang iba naman ay mga representative o kinatawan ng kumpanya.
Ipapa-subpoena ng Senate Blue Ribbon Committee na pinamumunuan ni Sen. Rodante Marcoleta ang walong contractor na hindi dumalo sa pagdinig.
Sa 15 contractor na inimbitahan, ang mga personal na dumalo sa pagdinig ay mga President/Owner ng mga kumpanya kabilang ang Legacy Construction Corporation, QM Builders, EGB Construction Corporation, Triple 8 Construction & Supply, Inc., Road Edge Trading & Development Services, habang abogado naman ang ipinadala ng Centerways Construction and Development Inc., at MG Samidan Construction.
Hindi dumalo at papadalhan ng subpoena sina Cezarah Discaya, President ng Alpha and Omega Gen. Contractor 8 Development Corporation; Ma. Roma Angeline Romando, Owner/Manager ng St. Timothy Construction Corporation; Eumir Villanueva, President ng Topnotch Catalyst Builders Inc.; at Aderma Angelie Alcazar, President/CEO ng Sunwest, Inc.
Ipapa-subpoena rin sina Edgar Acosta, President ng Hl-Tone Construction & Development Corp.; Romeo Miranda, President AMO ng Royal Crown Monarch Construction & Supplies Corp.; Mark Allan Arevalo, General Manager ng Wawao Builders; at Luisito Tiqui, President ng L.R. Tiqui Builders, Inc.