November 21, 2025 | 12:00am
Dear Dr. Love,
Mabigat po ang kalooban ko ngayon. May girlfriend ako na mahal na mahal ko. Mabait siya, tapat, at wala naman akong nakikitang masama sa kanya. Pero ang kuya ko, imbes na suportahan ako, ay siya pang nagsasalita ng kung anu-anong paninira laban sa girlfriend ko. Sinabi niya sa pamilya na hindi raw ito seryoso, na baka raw lokohin lang ako, at kung anu-ano pang kwentong wala namang basehan.
Ang mas masakit po Dr. Love, hindi man lang niya ako kinausap bago niya sinabing lahat ng iyon. Para bang sinabotahe niya ang relasyon ko nang hindi niya alam ang buong kwento. Ngayon tuloy, parang may lamat na sa tingin ng pamilya ko ang girlfriend ko, kahit wala naman siyang ginagawang masama.
Nasasaktan po ako. Sana po matulungan ninyo ako kung ano ang tamang gawin, at paano ko haharapin ang kuya ko para hindi na lumala pa ang sitwasyon.
Marco
Dear Marco,
Normal lang ang sakit na nararamdaman mo. Kapag ang taong dapat sana’y kakampi mo ay siya pang unang sumira sa minamahal mo, tiyak na mabigat sa dibdib.
Kausapin mo ang kuya mo nang mahinahon at may respeto. Pakiusapan mo siyang pakinggan ang panig mo. Hindi lahat ng paninira ay masama ang intensyon; minsan nagmumula sa maling akala o sobrang proteksyon.
Panindigan mo ang katotohanan at tiyaking alam ng girlfriend mo na nasa likod ka niya. Huwag mong hayaan na ang duda ng iba ang magdikta sa inyong relasyon.
Ang tunay na pag-ibig ay tumitibay sa mga pagsubok. At ang respeto sa pamilya ay maaari pa ring manatili kahit ipinagtatanggol mo ang taong mahal mo.
DR. LOVE