MANILA, Philippines — Pinahaharap ng Korte Suprema si Marikina 2nd District Rep. Stella Quimbo at mga miyembro ng technical working group (TWG) sa oral argument ukol sa blangkong items sa bicameral conference committee report ng 2025 national budget.
Ayon kay Atty. Vic Rodriguez, inobliga ng Korte Suprema na humarap si Quimbo sa pagpapatuloy ng oral argument patungkol sa isyu sa Abril 1, 2 at 3, 2025.
“Rep. Stella Quimbo and the TWG staff have been required by the SC to attend the oral arguments on April 1, which may last till April 3, in Baguio City,” ayon kay Solicitor General Menardo Guevarra.
“Ipinag-utos ang pagdalo at presensya ng mga miyembro ng Technical Working Group ng Senado at House of Representatives,” saad naman ni Rodriguez sa kanyang Facebook post.
Nagsampa ng petisyon si Rodriguez sa Korte para kuwestiyunin ang legalidad ng 2025 budget dahil sa nadiskubreng blangkong items sa bicam report ng Kamara at Senado.
Magugunitang si Quimbo ang dating vice chairperson ng Committee on Appropriations na bumisisi sa 2025 national budget.
Naupo si Quimbo bilang chairperson ng Committee on Appropriations matapos magbitiw ang dating chairman na si Zaldy Co.