MANILA, Philippines — Mismong si Ombudsman Samuel Martires ang naghain ng mosyon sa Court of Appeals (CA) na ibasura ang temporary restraining order (TRO) na inisyu upang pigilan ang inilabas nilang suspension order laban kay outgoing Cebu Governor Gwen Garcia.
Inihain ni Martires ang mosyon noong Mayo 30, 2025 sa CA sa giit na naipatupad na ang preventive suspension na ipinataw ng Ombudsman laban kay Garcia bago pa magpalabas ng TRO ang Appellate Court.
“But this Honorable Court closed its eyes to this very basic doctrine that “when the acts sought to be prevented by the injunction or prohibition have already been performed or completed prior to the filing of the injunction suit, nothing more can be enjoined or restrained… the court by mere issuance of the writ, can no longer stop or undo the act,” ani Martires sa inihaing mosyon.
Noong Abril 29, 2025 nang iutos ng Ombudsman ang preventive suspension ng 6 na buwan ng walang suweldo, kaugnay sa grave abuse of authority sa iligal na pagbibigay ng special permit sa isang construction company.
Hindi tumugon si Garcia at sa halip hiniling sa CA ang TRO laban sa suspension.
Kinontra ni Martires ang naging basehan ng CA na mahahadlangan ng suspension ang pagseserbisyo sa mga taga-Cebu.
Hindi rin aniya angkop sa Ombudsman ang pagbabawal na magsuspinde ng government officials sa panahon ng halalan.