September 3, 2025 | 12:00am
MANILA, Philippines — Inihayag ng PNP-Highway Patrol Group at Metropolitan Manila Development Authority (MMDA) na tumaas ang bilang ng mga nasawi dahil sa aksidente sa motorsiklo.
Nasa 36% sa road crashes ay sangkot ang motorsiklo noong 2023. Mas mataas ito sa 29% noong 2017.
Sa Metro Manila, 76% ng fatal collisions noong nakaraang taon ay dahil sa motorsiklo.
Ayon sa Department of Health (DOH), dalawa katao ang average ng bilang ng namamatay kada araw dahil sa motorsiklo.
Dahil dito, nanawagan ang transport safety advocates na magpatupad ng agarang systemic reforms sa Philippine roads.
“This is no longer just a road safety issue, it’s a national public health emergency,” pahayag ni Elvie Medina, spokesperson ng National Coalition for Safe Philippines (NCSP).
Suportado ni Medina ang panukalang National Motorcycle Safety and Training Program na isinusulong ng Department of Transportation (DOTr) at Land Transportation Office (LTO).
Kabilang sa mga reporma ang tiered licensing, mandatory hands-on training with road simulations, expanded rider testing centers, at mobile spot-check enforcement sa high-risk areas.
Welcome naman kay transport policy expert Dr. Paul Chua ang panukala.
Tatlong system-wide solutions ang inilatag ni Chua. Ito ay ang dedicated motorcycle lanes with physical barriers, unified enforcement app to standardize penalties and reporting, at route franchising model.