August 25, 2025 | 12:00am
MANILA, Philippines — Inaasahan ng defense team ni dating Pangulong Rodrigo Duterte na aabot sa humigit kumulang sa limang (5) oras ang gugugulin sa “confirmation of charges hearing” sa International Criminal Court sa darating na Setyembre.
Sa tatlong-pahinang dokumento na isinumite sa Pre-trial Chamber 1 na may petsang Agosto 22, inilatag ng abogado ni Duterte na si Nicholas Kaufman ang inaasahang magiging takbo ng presentasyon.
“The Defense envisages expending 30 minutes for its opening statement and 30 minutes for its closing statement,” sabi ni Kaufman sa dokumento.
Binigyang-diin nila ang kanilang kliyente na “hindi gumawa ng anumang kriminal na pagkakasala” sa war on drugs ng kanyang administrasyon, kung saan sinasabing hindi bababa sa 7,000 “drug personalities” ang napatay ng mga awtoridad.
Idinagdag ni Kaufman na sa gagawing main presentation, ipapaliwanag ng depensa ang ilang legal points at kung papaano naugnay si Duterte sa bintang na crimes against humanity.
“In its oral presentation which will last 3-4 hours, the Defense will expand, inter alia, on a number of core legal issues which concern the modes of liability imputed to Mr. Duterte and the contextual requirements of crimes against humanity,” nakasaad sa dokumento.
Sinabi rin ni Kaufman sa huling bahagi ng dokumento na “for the sake of clarity and the historical record, Mr. Duterte did not commit any criminal offense” and had instead “served his city and country, faithfully and with pride, for many years.”