Discaya bumili ng Rolls Royce dahil nagandahan sa payong


Malou Escudero — Pilipino Star Ngayon

September 2, 2025 | 12:00am

MANILA, Philippines — Kinumpirma ni Sarah Discaya na nagandahan siya sa payong kaya siya bumili ng isang mamaha­ling sasakyan.

Sa pagdinig ng ­Senate Blue Ribbon Committee kahapon, inusisa ni Sen. Jinggoy Estrada ang tungkol sa viral interview kay Discaya kung saan binanggit niyang binili niya ang isang Rolls Royce dahil nagandahan siya sa payong.

“Sir, yes po,” pagkumpirma ni Discaya.

Inamin din ni Discaya na mayroon siyang 28 luxury vehicles gaya ng Rolls Royce at Cadillac.

Umaabot sa P200 ­milyon ang halaga ng binili ni Discaya sa luxury car importers Frebel Enterprises at Autoart Luxury Cars.

Kabilang sa car collection ng pamilya Discaya ang isang Rolls Royce Cullinan na nagkakahalaga ng P42 milyon, Mercedes Benz Maybach (P22 milyon), Bentley Bentayga (P20 milyon), Mercedes Benz-AMG Wagon G63 (P20 milyon), dalawang units ng Cadillac Escalade (P11 milyon bawat isa), dalawang unit ng GMC Yukon Denali (P11 milyon bawat isa), Range Rover Autobiography (P16 milyon), Range Rover Defender (P7 milyon), Range Rover Evoque (P5 milyon), at Chevrolet Suburban (P3 milyon).

Ibinunyag din ni Senate Minority Leader Vicente “Tito” Sotto III na dati ng nasangkot ang Frebel Enterprises sa pag-smuggle o pagpuslit ng dalawang l­uxury Bugatti Chiron sports car sa Pilipinas.

Inamin ni Discaya sa pagdinig na mayroon siyang 28 na mga mamahaling sasakyan pero wala siyang Bugatti.