September 13, 2025 | 12:00am
MANILA, Philippines — Kinumpirma kahapon ni Department of Public Works and Highways (DPWH) Secretary Vince Dizon na sinibak na rin mula sa ahensiya sina dating Bulacan first district assistant engineers Brice Hernandez at Jaypee Mendoza na sangkot sa maanomalyang flood control projects sa bansa.
Una nang dinismis si dating Bulacan first district engineer Henry Alcantara mula sa DPWH.
Paniniyak ni Dizon, masusundan pa ito dahil sinisimulan na rin nilang iproseso ang dismissal ng iba pang sangkot sa anomalya sa DPWH.
Blacklisted na rin ang mga kontratistang sinampahan nila ng reklamong graft sa Office of the Ombudsman dahil sa maanomalyang flood control projects. Kabilang dito ang St. Timothy Construction Corporation, SYMS Construction Trading, Wawao Builders at IM Construction Corporation.
“Na-blacklist na po itong mga contractor na ito,” aniya.