MANILA, Philippines — Isinailalim na sa signal number 4 ang tatlong lalawigan sa Luzon matapos na lumakas pa nitong Huwebes ang bagyong Emong.
Ayon sa PAGASA, taglay ni Emong ang lakas ng hangin na 120 km per hour (kph) at bugso na 150 kph.
Si Emong ay inaasahang magla-landfall sa La Union, Ilocos Sur o Ilocos Norte ngayong Biyernes.
Nakataas ang signal no. 4 sa timog kanlurang bahagi ng Ilocos Sur; hilagang kanluran ng La Union; at hilagang kanluran ng Pangasinan.
Signal No. 3 sa kabuuan ng Ilocos Sur; kabuuan ng La Union; hilaga at kanlurang bahagi ng Pangasinan; katimugang bahagi ng Abra; kanlurang bahagi ng Mountain Province; kanlurang bahagi ng Benguet.
Signal No, 2 sa Ilocos Norte, kabuuan ng Pangasinan, kabuuan ng Abra, Apayao, Kalinga, kabuuan ng Mountain Province; Ifugao, kabuuan ng Benguet, Babuyan Islands; hilaga at kanlurang bahagi ng mainland Cagayan; kanlurang bahagi ng Nueva Vizcaya at hilagang bahagi ng Zambales.
Samantala napanatili ng bagyong Dante ang lakas bago ang inaasahang paglisan nito sa Philippine Area of Responsibility (PAR).