Dear Dr. Love,
Isa po akong dalagang may boyfriend na mahal ko at matagal ko nang kasama. Mabait siya, responsable, at lagi akong inaalagaan. Pero may isang bagay na hindi ko maintindihan hanggang ngayon.
Ayaw niyang sabihin kung saan siya nagtatrabaho. Kapag tinatanong ko siya, iniiwasan niya ang usapan o kaya’y sinasabing hindi pa raw tamang panahon para malaman ko.
Nang minsang pilitin ko siyang magpaliwanag, sinabi niya na natatakot siyang laitin o maliitin ng aking mga magulang kapag nalaman ang kanyang trabaho. Hindi naman mayaman ang pamilya namin, pero aminado akong mataas ang pangarap ng mga magulang ko para sa akin.
Sabi ng boyfriend ko, baka raw hindi siya matanggap at husgahan agad dahil hindi ganoon kalaki ang kanyang kinikita o hindi “maganda” sa paningin ng iba ang kanyang trabaho. Mahal ko siya, pero gusto ko ring maging tapat kami sa isa’t isa.
Tama po bang hintayin ko na kusa siyang magsabi, o dapat ko nang hilingin na maging bukas siya sa akin?
Ms. Confused
Dear Ms. Confused,
May kasabihan na, “Ang taong may lihim ay hindi laging manloloko; minsan siya ay sugatan lamang ng paghusga ng mundo.”
Posibleng hindi ka niloloko ng iyong boyfriend. Maaaring dala niya ang takot na maranasan ang pangmamaliit na baka naranasan na niya noon.
Hindi lahat ng tao ay may kumpiyansang ipagmalaki ang kanilang trabaho, lalo na kung pakiramdam nila ay hindi ito papasa sa pamantayan ng iba.
Ngunit sa isang seryosong relasyon, maha-laga pa rin ang katapatan. Hindi mo kailangang pilitin siya, pero may karapatan kang malaman ang katotohanan tungkol sa taong minamahal mo. Ang tiwala ay hindi nabubuo sa pagtatago kundi sa pagiging bukas.
Sabihin mo sa kanya na hindi trabaho ang sukatan ng pagmamahal at pagkatao. Mas kahangahanga ang taong marangal na naghahanapbuhay kaysa sa taong mataas ang posisyon ngunit walang integridad. At kung sakaling husgahan man siya ng ibang tao, tandaan niyang hindi ang titulo sa trabaho ang nagbibigay ng dignidad sa isang tao kundi ang sipag, dangal, at pagmamahal na kanyang ipinapakita.
Ang tunay na pag-ibig ay hindi nagha-hanap ng perpektong trabaho, kundi ng taong tapat at handang magsikap para sa kinabukasan.
DR. LOVE