MANILA, Philippines — Sinimulan na kahapon ng Philippine Air Force (PAF) at counterpart nito mula sa United States Pacific Air Forces (PACAF) ang Cope Thunder Philippines (CT PH 25-1) war games sa ilang lugar sa Northern at Central Luzon bilang bahagi ng Phl-US Balikatan joint military exercises.
Pinangunahan ni PAF Chief Lt. Gen. Arthur Cordura at PACAF Air National Guard Mobilization Assistant Major Gen. Christopher Sheppard ang pagbubukas ng war drills sa Clark Air Base sa Mabalacat City, Pampanga.
Isasagawa ang war drills sa Basa Air Base at Clark Air Base sa Pampanga, Colonel Ernesto Ravina Air Base sa Tarlac na tatagal hanggang Abril 18.
Ang PAF ay magdedeploy ng 729 personnel at mga aircraft gaya ng FA-50PH, A-29 B Super Tucano, S-76 A at S70i Black Hawk helicopters habang ang PACAF ay 12 F16 fighter jets at 250 personnel.
Iho-host ng PAF ang International Observer Program bilang bahagi ng war drills na lalahukan ng mga kinatawan ng Royal Malaysian Air Force, Royal Thai Air Force, Royal Australian Air Force, Japan Air Self-Defense Force at Indonesian Air Force.