Dear Dr. Love,
Ako po si Lito, 56-anyos, isang biyudo. Tatlong taon na ang nakalipas mula nang pumanaw ang aking asawa dahil sa sakit. Hindi ko maipaliwanag ang sakit at lungkot na aking pinagdaanan—para bang nawala ang kalahati ng aking pagkatao. Sa mga panahong iyon, ang tanging naging sandigan ko ay ang aking mga anak.
Pero habang tumatagal, unti-unti kong naramdaman ang matinding pag-iisa. Tahimik ang bahay, wala na ang dating saya at lambing na nakasanayan ko. Hanggang sa may nakilala po akong isang babae—mabait, maunawain, at handang samahan ako sa natitira kong buhay. Hindi niya kailan man sinubukang palitan ang aking yumaong asawa, kundi ni-rerespeto niya ang alaala nito.
Sa unang pagkakataon, naramdaman ko uli na may dahilan akong ngumiti.
Subalit nang ipaalam ko ito sa aking mga anak, mariin po silang tumutol. Para sa kanila, tila pagtataksil ito sa kanilang ina. Ayaw nila akong mag-asawa muli. Sinasabi nilang sapat na raw ang pagmamahal ko sa kanilang ina kahit wala na ito.
Masama po ba ang hangarin kong muling magmahal? Tama po bang ipagkait ko sa sarili ang pagkakataong maging masaya muli para lamang sa kagustuhan ng aking mga anak?
Lito
Dear Lito,
Una sa lahat, yakap para sa iyo. Ang mawalan ng kabiyak ay hindi biro—at ang magpatuloy sa buhay pagkatapos nito ay isang matinding laban ng puso at isipan.
Hindi masama ang muling magmahal. Hindi ito pagtataksil. Ang pag-ibig ay hindi nauubos—kaya nitong lumago at muling mamukadkad, kahit pa may iniwang sugat ang nakaraan.
Ang nararamdaman ng iyong mga anak ay normal din. Mahal na mahal nila ang kanilang ina, at para sa kanila, ang ideya ng ibang babaeng papalit ay masakit tanggapin. Ngunit hindi nila dapat kalimutan na ikaw ay hindi lamang ama—ikaw rin ay isang taong nanga-ngailangan ng pagmamahal at kasama.
Ang susi rito ay pag-uusap at pag-unawa. Huwag mong pilitin ang mga anak mo, ngunit huwag mo ring isakripisyo ang sarili mong kaligayahan. Ipakita mo sa kanila na ang pagmamahal mo sa kanilang ina ay mananatili, kahit may bago kang mamahalin.
Bigyan mo sila ng panahon. Hindi agad-agad matatanggap, pero kung totoo at malinis ang iyong hangarin, darating din ang araw na mauunawaan ka nila.
Ang puso, kapag nasaktan, hindi dapat ikulong—dapat itong bigyan muli ng pagkakataong magmahal.
DR. LOVE