MANILA, Philippines — Patay ang tatlong miyembro ng rebeldeng New People’s Army (NPA) matapos ang madugong engkuwentro laban sa tropa ng militar sa Barangay Bonglo, Licuan-Baay, Abra, kahapon ng umaga.
Sa report na nakarating sa tanggapan ni Major General Gulliver Señires, Commander ng 5th Infantry “Star” Division na nakabase sa Gamu, Isabela, nasa 10 na miyembro ng Ilocos-Cordillera Regional Committee (ICRC) ang nakasagupa ng mga tauhan ng 50th Infantry (Defender) Battalion at 98th Infantry (Masinag) Battalion sa lugar dakong alas-11:10 ng umaga.
Base sa ulat ng militar, ito na ang ika-apat na sagupaan na nangyari sa pagitan ng mga natitirang rebelde at tropa ng gobyerno sa lugar.
Maliban sa tatlong bangkay ng mga rebelde ay nakuha rin ng mga sundalo sa encounter site ang 2 M16 rifles, at isang M14 rifle ng mga rebelde.
Bunsod nito, patuloy ang panawagan ni Señires sa mga natitirang mga rebeldeng grupo na magbalik-loob na sa pamahalaan at yakapin ang kapayapaan na inaalay ng gobyerno para makapamuhay ng tahimik kasama ang kanilang mga mahal sa buhay.