November 11, 2025 | 12:00am
Ikinuwento ni Guava kay Apol na bago pala ito regaluhan ng tsinelas ng babae noong 13-anyos siya, may isang pangyayari na naligaw siya ng daan habang pauwi sa kanilang bahay.
Galing umano sa school si Guava. Tanghaling tapat noon. Nilalakad lamang niya ang kanilang bahay dahil malapit lamang ito sa school. Mga sampung minuto raw niyang nilalakad, ayon kay Guava.
Pero nagtaka raw siya dahil ibang landas ang dinaanan niya.
“Lakad ako nang lakad. Pero wala akong nararating. Pakiramdam ko, ikut ako nang ikot. Pabalik-balik lang ako.”
“Ano ang dinaraanan mo?” tanong ni Apol na nagtataka dahil mayroon pa palang ganung karanasan si Guava.
“Sa kalsada.”
“Bakit hindi ka nagtanong sa mga nakasalubong mo?”
“Walang tao sa kalsada. Ako lang ang naroon ng mga sandaling ‘yun.”
“Anong ginawa mo?”
“Nagpatuloy ako sa paglalakad.”
“Pagkatapos anong nangyari?”
“Nang mapagod ako sa paglalakad, naupo ako at sumandal sa pader.”
“Paano nagkaroon ng pader?”
“Nagtataka nga ako kung bakit.”
“Anong sumunod na nangyari?”
“May narinig akong usapan habang nakasandal sa pader. At alam mo ang narinig kong boses?”
“Kanino?”
“Kay Papa at Mama. Nag-uusap sila. At ‘yung sinasandalan kong pader, sa amin pala ‘yun!”
“Anong nangyari?”
“Sumigaw ako. Tinawag ko sina Papa at Mama. Gulat na gulat sila nang makita ako na nakasandal sa pader. Ano raw ang ginagawa ko roon? Kanina pa raw nila ako hinihintay. Sabi ko naligaw ako.”
Hindi sila makapaniwala.
(Itutuloy)