December 19, 2025 | 12:00am
“Kailan po kami babalik Doktora?” tanong ni Apol habang hawak ang kanang kamay ni Guava.
“Bumalik kayo after one month for checkup.”
“Salamat Doktora. Excited po kami sa unang baby namin ni Guava.”
“I know Apol. Nakikita ko sa mukha mo.”
“Ganito po pala ang nararamdaman ng first time father—kinakabahan na hindi ko maintndihan.”
Humalakhak ang mabait na doktora.
“E di lalo na kapag nanganak si Guava. Baka hindi mo malaman kung saan ka uupo, ha-ha-ha!”
“Tiyak po yun, Doktora, ha-ha-ha!”
“Normal lang yan, Apol. Sige, mag-ingat kayong mag-asawa. See you next month.”
Umalis na sina Apol at Guava.
Kinabukasan, nagpakuha uli ng mga manibalang na bayabas si Guava kay Apol.
“Ngayon ay alam ko na ang pinaglilihihan mo —bayabas!”
Napangiti si Guava.
“Hindi kaya sumakit ang tiyan mo? Wala pang laman e bayabas na agad?”
“Hindi. Sanay na ako.”
“Baka kasi…”
“Sige gusto mo ba na kung mapaano itong dinadala ko?”
“Aba hindi. Sige kukuha na ako ng bayabas.”
“Mga manibalang ha? Hindi ko kakainin kapag hindi manibalang.”
“Opo.”
Makalipas ang ilan pang buwan, halata na ang tiyan ni Guava.
“Ang bilis lumaki. Hindi kaya kambal yan?”
(Itutuloy)