October 5, 2025 | 12:00am
NAGHIWA ng sibuyas, kamatis at bawang si Guava. Hinimay ang talbos ng sili. Pinakuluan naman ni Apol ang monggo. Nakasalang na rin sa rice cooker ang sinaing.
“Sanay ka nang magluto, Apol?”
“Oo.”
“Matagal na?”
“Mula nung humiwalay ako sa parents ko.”
“Anong age mo?”
“Mga 23 o 24.”
“Dito ka na tumira?”
“Hindi. Nangupahan ako.”
“Bakit ka humiwalay sa parents mo?”
“Gusto kong matutong mabuhay nang nag-iisa—tumindig sa sariling paa.”
“Parehas pala tayo—gusto ko rin ng solo flight.”
“Kaya ka nangupahan sa Makati?”
“Oo. Isa pa malayo talaga ang sa amin.”
“Mas maganda kapag nag-iisa ano? Sarili mo ang mundo.”
“Correct. Ikaw ang magpapasya.”
Maya-maya ginisa na ni Apol ang monggo. Nakatingin si Guava.
“Ikaw na ang nagpatayo ng bahay na ito.”
“Oo. Binili ng parents ko ang lote.”
Maya-maya, pinrito na ni Apol ang isda.
Nang maluto ang monggo at isda, naghain na si Apol.
“Halika na, kain na tayo,” yaya ni Apol.
“Tikman ko nga ang luto mo.”
Masaya silang kumain.
Itutuloy