September 2, 2025 | 12:00am
MARAMING nagulat sa resignation ni Department of Public Works and Highways (DPWH) secretary Manuel Bonoan noong Linggo. Noong Sabado, mariing pinahayag ni Bonoan na hindi siya magre-resign.
Sinabi pa nito na may mga sinuspende na siyang mga opisyales sa tanggapan. Pero biglang inihayag ng Malacañang na nagbitiw na si Bonoan. Inihayag din ng Malacañang na si DOTr Sec. Vince Dizon ang kapalit ni Bonoan.
Sa pagkaalam ko, malinis si Bonoan sa pamamalakad sa ahensiya at ang nais lamang malaman ay kung sinu-sino ang nagmamaniobra sa mga proyektong pinonduhan ng bilyon mula noong 2022 hanggang 2025.
Sa kabila na may malaking pondo para flood control project, binabaha pa rin ang Metro Manila at maraming lugar sa bansa.
Tuloy naman ang imbestigasyon ng Senate Blue Ribbon Committee at Kamara pero sa tingin ko, mahihirapan nang mabawi ang kinurakot na pondo.
Ganunman, dapat pa ring habulin ng mga mambabatas ang mga contractors na nandambong ng bilyun-bilyong piso. Karamihan sa mga flood control projects ay palpak at ang iba ay hindi makita dahil ghost projects.
Sigurado akong itutuga ng mga contractors kung sinu-sino sa DPWH ang kanilang kakutsaba para makawat ang bilyones na perang galing sa taxpayers.
Dapat talagang sabihin na ng contractors ang kanilang kasabwat sa DPWH para maparusahan na sila. Damay-damay na sila.
Kung walang mangyayari sa imbestigasyon ng Senate Blue Ribbon Committee sa mga mapagsamantalang contrators at mga ganid na DPWH officials, magpapatuloy pa rin ang pagnanakaw.
Alam ko may mga pulitikong contractor din at nakakopo nang malaking halaga ng pera. Ginawang palabigasan ng mga gahamang pulitiko.
Nalaman ko na maaaring imbitahan daw sa Senado si dating DPWH Secretary Bonoan. Kailangang marinig ang kanyang panig sa mga nangyaring anomalya sa dati niyang tanggapan. Maaring ipatawag siya ng Blue Ribbon.
Ang susunod na pandinig ay sa Lunes (Setyembre 8). Ipatatawag ding muli ang 15 kompanya na nakayakpat ng bilyun-bilyong pisong kontrata sa DPWH pero “ghost project” pala ang alam ng mga gahaman. Ang hindi raw dadalo ay isu-subpoena ng Senado.