September 2, 2025 | 12:00am
ANG buong akala ni ex-PNP chief Gen. Nicolas Torre III ay “fair-haired boy” siya ni President Bongbong Marcos. Tumaya naman kasi si Torre kay BBM at ang basehan ay ang pagkaaresto niya kay KOJC Pastor Apollo Quiboloy at ang pagkataboy niya kay Tatay Digong sa ICC sa The Hague, Netherlands.
Hindi lang ‘yan, tuwang-tuwa rin si BBM kay Torre at ipinakita naman niya ito noong SONA at nang ipakita nito personal ang SIMEX ng 5-minute response n’ya sa Camp Crame. Kahit alam niyang may “demolition job” laban sa kanya, hindi ito pinansin ni Torre. Trabaho lang siya.
Maging ang Napolcom resolution ay hindi rin niya pinansin dahil ipinaliwanag niya itong maigi kay BBM, gamit ang pinirmahan na dokumento ni Executive Sec. Lucas Barsamin. Kaya lang, hindi naman humihinto ang cabal sa Palasyo para matanggal si Torre dahil sa P8-bilyon na kadahilanan.
Ang last straw ni Torre ay ang intel report na pinaniwalaan ni BBM, kahit hindi pa ito dumaan sa validation. Ang sakit sa bangs nito!
Teka, teka, nais lang klaruhin ni DIDM director Brig. Gen. Matthew Baccay, ang Napolcom reso sa paglipat ng 3rd level officers sa puwestong parehas lang ng ranggo ng apektadong opisyal. Tama lang ang dokumentong pirmado ni Bersamin. Kaya lang kapag nasa command group ka na, may basbas dapat ito ng Palasyo.
Ayon kay Baccay, si PNP OIC Lt. Gen. Jose Melencio “Tateng” Nartatez Jr. ay DCA na noon, o No. 2-man ng PNP. At ang ilipat siya sa APC sa Mindanao ay hindi na angkop sa pinirmahan ni Bersamin at dapat may go signal ito ni BBM, bilang kanilang commander-in-chief. May punto si Atty. Baccay, ‘no mga kosa?
Ibinigay pa ni Baccay na halimbawa ang kaso nina ret. Gen. Rhodel Sermonia at ret. Gen. Michael John Dubria na nagretiro na acting pa rin dahil walang confirmation ang Malacañang. Anong sey n’yo mga kosa? Hindi spokesperson ni Nartatez si Baccay ha? Hehehe! Kanya-kanyang gimik lang talaga!
Dahil sa tingin nila bagyo si Torre kay BBM, nais hingin ang tulong ng una ng 18 opisyales na tinanggap ng huli ang resignation nila dahil sa droga. Iginigiit ng 18 opisyal na hindi naman sila nag-resign. Ang pinirmahan nila ay willing silang mag-resign kapag napatunayan na sangkot sila sa droga. Ang problema lang may nag-madyik sa papeles ng 18 opisyal at ang pinalabas sa sulat kay BBM ay payag silang mag-resign.
Ang unang hakbang ng 18 opisyal ay halungkatin ang papeles na pinirmahan nila at nawawala ang records nito sa PNP. Araguyyy! At ang cabal sa Palasyo, na ang lider ay isang Cabinet secretary, ay gumawa ng intel report na ang 18 ay panay miting kay Torre at may masamang hakbangin sa gobyerno ni BBM. Destab ba ‘yun? Sanamagan!
Sinamahan pa ito ng litrato at video ng mga mistah ni Torre na naggi-get together sa isang hotel. Araykupooo! Sa sobrang malas naman nitong 18 dismissed officers, naniwala si BBM sa intel report at hayun….goodbye na lang at biglaang sinibak si Torre. Dipugaaa! Hehehe! Ambot sa kanding nga may bangs!
Marami pang dahilan kung bakit nasibak si Torre at ang kumakalat sa social media ay hindi pagiging team player nito sa P8 billion purchase ng baril. Ayon sa Marites, kung natuloy ang overpriced na transaction, abayyy maliwanag pa sa sikat ng araw ang P800-million na kikitain dito.
At ang facilitator ng transaction ay itinuturo na anak ng isang opisyal ng DILG. Ano ba ‘yan? Mabuti na lang at alerto si Torre at napigilan ito. Malaking kawalan sana ang pitsa sa gobyerno! Abangan!