MANILA, Philippines — Kinumpirma ng Department of Migrant Workers (DMW) na maghahain sila ng graft charges laban kay dating Overseas Workers Welfare Administration (OWWA) Administrator Arnell Ignacio.
Ayon kay DMW Secretary Hans Leo Cacdac, nakatakda nilang isampa ang kaso laban kay Ignacio sa Office of the Ombudsman ngayong linggong ito.
Bukod kay Ignacio, sasampahan din ng kaso ang nasa 10 pang indibidwal, kabilang ang dalawang dating deputy administrators, at ilang indibidwal na sinasabing sangkot sa hindi awtorisadong P1.4 bilyong land deal.
“We’re slated to file [at] the Ombudsman case this week. The violation of the Anti-Graft and Corrupt Practices Act and Other Laws,” ani Cacdac.
Matatandaang si Ignacio at kanyang mga deputy administrators ay sinibak noong Mayo kaugnay ng September 2024 land acquisition, na hindi umano dumaan sa OWWA Board of Trustees.
Siya ay pinalitan sa puwesto ni DMW Undersecretary for Policy and International Cooperation Patricia Yvonne Caunan.