MANILA, Philippines — Simula ngayong Lunes (Hunyo 2), tatanggapin na ng ilang Mercury Drug stores sa buong bansa ang guarantee letters (GLs) mula sa mga benepisyaryo ng Department of Social Welfare and Development (DSWD) Assistance to Individuals in Crisis Situation (AICS) at Ayuda para sa Kapos ang Kita Program (AKAP).
Ang nasabing GLs ay bilang form of payment o pambayad sa mga gamot na maaring magamit sa mga participating branches ng Mercury Drug stores sa buong bansa.
Nasa 92 sangay ng Mercury Drugs sa National Capital Region, Central Luzon, Calabarzon, Mimaropa, Central Visayas, Western Visayas, Eastern Visayas, Zamboanga Peninsula, Northern Mindanao, Davao Region, SOCSKSARGEN, at Caraga ang kikilala sa GL na inisyu ng DSWD upang tulungan ang mga benepisyaryo na makatipid sa pagbili ng mga gamot.
Ang AICS ay naka-target sa mga indibidwal o pamilya na nakararanas ng krisis, trahedya, o matinding kahirapan.
Sa kabilang banda, ang AKAP ay para sa mga indibidwal na kumikita ng mas mababa sa minimum na sahod.