November 4, 2025 | 12:00am
MAGPAPAGAWA ang Bangko Sentral at Monetary Board ng bagong compound sa Clark Economic Zone. Napabalita na ang budget ay P50 bilyon. Pinabulaanan ito ni Benjamin Diokno, dating BSP governor at ngayo’y MB member. Hamak na mas mababa raw ang halaga.
Pero bilyong piso pa rin. Kaya nagngingitngit ang mamamayan. Mas kailangan daw ng mga silid-aralan, health centers pang-dialysis at X-ray, at pabahay sa squatters.
Sa bilyong-pisong BSP-MB complex iilang opisyales lang ang magbubuhay-marangya. Magsisiksikan sa staff offices, canteens, at toilets ang mabababang empleyado.
Huwag naman sana mamihasa ang mga pinuno ng BSP at MB. Palibhasa pinakamatataas ang sweldo nila sa buong gobyerno:
l BSP governor, P48 milyon kada taon o P4 milyon kada buwan;
l Monetary Board member, lima sila mula pribadong sector, tig-P26 milyon kada taon o P2.2 milyon kada buwan:
l Deputy BSP governor, lima rin sila, tig-P22 milyon kada taon, o P1.8 milyon kada buwan;
l Assistant BSP governor, siyam, tig-P19 milyon kada taon, o P1.6 milyon kada buwan.
Mas mataas ang sahod nila kaysa Presidente, P5 milyon kada taon, o P416,666 kada buwan; at miyembro ng Gabinete, senador, at congressman, P4 milyon kada taon o P334,059 kada buwan.
Isinabatas ang mas mataas na sahod sa BSP at MB para maging independiyente sila. Ibig sabihin ng independiyente ay hindi basta-basta mauutusan ng bangkero o Presidente, Gabinete, Kongreso. At independiyente para maglingkod nang lubos sa bayan.
Ang paglilingkod sa bayan ay pakikiisa sa karaniwang mamamayan. Ang karaniwang mamamayan ay hikahos, at nagsisikap mag-aral, magpalusog, at mag-hanapbuhay.