WALUMPU’T ANIM sa 156 party-lists, o 55.13%, ay questionable, anang election watchdog Kontra Daya. Konektado kasi sila sa:
(1) Political dynasties na binabawal ng Konstitusyon,
(2) Malalaking kumpanya na nagsusulong ng oligarkiya,
(3) Mga grupong pulis-militar na kontra sa malayang pag-iisip,
(4) Nililitis o sentinsyado dahil sa katiwalian,
(5) Kahinahinalang adhikain o malabong plataporma, at
(6) Kulang-kulang na impormasyon, parang may itinatago.
Inehemplo ni UP Prof. Danny Arao, Kontra Daya convenor, ang partidong Kaunlad Pinoy:
“Unang nominee si James Christopher Napoles. Kung matunog ang pangalan niya, ‘yon ay dahil anak siya ni Janet Lim-Napoles – pork barrel fixer para sa 20 senador at 100 kongresista nu’ng 2014.
“Habambuhay nakabilanggo si Ms. Napoles dahil sa pandarambong, kaya hindi na maaring iboto at bumoto.
“Hindi sentinsyado si James Christopher. Pero hinabla siya nu’ng 2017 ng tig-97 counts ng katiwalian at pangungulimbat sa pamamagitan ng mga palsipikadong dokumento.
“Nu’ng 2018 hinabla siya sa America, kasama si Ms. Napoles at apat pang iba, dahil sa kutsabahan na magpasok at maglabas ng $20 milyon. Pera ‘yon ng Pilipinas na nakalap sa maraming taon ng panunuhol at panggagantso.”
Dapat malaman ng botante ang katauhan ng Kaunlad, ani Arao.
Mabuti pa sana ku’ng hindi ito pinahintulutan ng Comelec kumandidato ang Kaunlad. Problema nga lang, mahina ang loob ng Comelec. Kaya ang mga halalan ay marumi, madaya, magulo.
Suriin ang party-lists: https://tinyurl.com/KDPLstudy2025
* * *
Makinig sa Sapol, Sabado, 8-10 ng umaga, DWIZ (882-AM).