August 19, 2025 | 12:00am
UNTI-UNTI nang natutumbok ni President Ferdinand ‘Bongbong’ Marcos Jr., ang mga palpak na flood control project na pinondohan ng bilyon-bilyong piso. May katwiran si Marcos sa sinabing “mahiya naman kayo!” na ang tinutukoy ay ang mga contractor sa palpak na flood control project.
Kitang-kita ni Marcos ang palpak na proyekto nang bumisita ito sa Bulacan noong nakaraang linggo. Nakita ng Presidente ang flood control project na bumabaw at tinubuan ng makapal na damo at ang mga dike ay putul-putol na dahil sa mababang kalidad ng semento.
Napansin ko na hindi naman binubuskahan ni Marcos ang mga opisyales ng Department of Public Works and Highways dahil sa mga palpak na proyekto. Bakit kaya?
Napag-alaman ko, hindi matutuloy ang proyekto kung hindi idinaraan sa bidding na mismong pinangangasiwaan ng DPWH, at kapag nai-award na ang proyekto doon na sasamantalahin ng mga dupang na kontratista ang pagkamal ng pera. Ang resulta nito, palpak na trabaho.
Napansin ko, nabulabog ang mga senador at kongresista sa sinabi ni Marcos na “mahiya naman kayo!’ dahil nagkukumahog ang mga ito na linisin ang kanilang hanay. Naglabasan sa social media na ang mga nakakopo nang malaking proyekto ay kasapakat ng mga senador at kongresista.
Ngayong araw na ito, si Senate Blue Ribbon Committee chairman Rodante Marcoleta ang imbestigasyon sa paglustay ng pondo sa mga palpak at moro-morong flood control project ng pamahalaan.
Aabangan naman si Baguio City mayor Benjamin Magalong ang pagsisiwalat ng mga pangalan ng mga pulitikong nakinabang sa pondo para sa flood control project. Ang mga miyembro ng House Tri-Committee ay interesado kay Magalong upang matukoy na ang mga kongresista na sangkot sa palpak na flood control project.
Sana naman ang isasagawang imbestigasyon ng Senado at House ay maging kapaki-pakinabang at hindi mabalewala. Gaya nang nangyaring pag-imbestiga ng House at pag-impeached kay VP Sara Duterte na sa dakong huli ay dineklara namang unconstitutional ng Supreme Court.
Samantala, habang nag-iimbestiga ang mga mambabatas, ipagpatuloy naman ng mamamayan ang pagsusumbong kay PBBM kaugnay sa mga palpak na proyekto sa flood control. Kailangang mahubaran ang mga makakapal ang mukha at walang hiya!