Pilipino Star Ngayon
September 6, 2026 | 12:00am
MANILA, Philippines — Nagpasalamat ang Lone District ng San Jose del Monte (SJDM) sa Senate Committee on Public Services sa paglalantad ng mga isyu sa hindi maaasahang serbisyo ng tubig na matagal nang nararanasan ng mga residente.
Sa pagdinig ng komite na pinamumunuan ni Sen. Raffy Tulfo, iniulat ang kalagayan ng nasa 47,611 kabahayan o nasa 250,000 residente na naapektuhan ng kakulangan sa suplay ng tubig.
Ayon sa SJDM, umabot sa tinatayang P300 milyon kada taon ang ginastos ng lokal na pamahalaan para sa emergency water tanker na nagsu-supply sa mahigit 60 barangay dahil sa problema sa serbisyo.
Tinalakay rin sa pagdinig ang mga natuklasang kakulangan sa dating operasyon ng PrimeWater at Hiraya Water, kabilang ang mga isyu sa pumping facilities at wastewater na iniulat sa Department of Environment and Natural Resources.
Umaasa ang SJDM na magreresulta ang imbestigasyon ng Senado sa pangmatagalang solusyon upang matiyak ang ligtas, maaasahan, at patas na serbisyo ng tubig para sa mga residente ng lungsod.