October 17, 2025 | 12:00am
MANILA, Philippines — Minalas ang apat na pares na Alas Pilipinas sa paghataw ng main draw ng Volleyball World 2025 Beach Pro Tour Challenge kahapon sa Nuvali Sands Court by Ayala Land sa Santa Rosa, Laguna.
Bigo sina Sisi Rondina at Bernadeth Pons kina world-ranked Thainara Mylena Feitosa de Oliveira at Talita Simonetti ng Brazil, 17-21, 16-21, sa Pool G play ng women’s division.
Sina Rondina at Pons ay World No. 137 kumpara sa World No. 72 na sina Oliveira at Simonetti na isa sa pitong world-ranked Brazilian pairs na naglalaro sa torneo.
Para buhayin ang tsansa sa quarterfinals ay pipilitin nina Rondina at Pons na talunin ngayong hapon sina Slovenian duo Ziva Javornik at Tajda Lovsin, ang World No. 78 team, na tinalo ng Alas aces sa Futures tournament sa Budapest noong nakaraang buwan, 16-21, 21-15, 15-9 sa torneong pinamamahalaan ng Phi-lippine National Volleyball Federation (PNVF) sa ilalim ni Ramon “Tats” Suzara.
Samantala, yumukod sina Kly Orillaneda at Gen Eslapor kina Anniina Parkkinin at Vilhelmiina Prihti ng Finland, 11-21, 15-21, sa Pool H.
Talo rin sina Sonny Villapando at Dij Rodriguez kina New Zealand pairs Shaunna Polley at Olivia MacDonald, 19-21, 14-21, sa Pool D.