December 3, 2025 | 12:00am
MANILA, Philippines — Itataya ng Philippine women’s softball team ang kanilang gold medal sa parating na 33rd Southeast Asian Games sa Thailand.
Huling nagreyna ang Blu Girls ni coach Ana Santiago noong 2019 edition na idinaos sa Pilipinas bago ito nawala sa calendar of events noong 2021 sa Hanoi at 2023 sa Cambodia.
“Even if there was no softball in the last two SEA Games (Hanoi at Cambodia), ‘yung hunger to win hindi naman nawala. Nothing less than the gold ang goal natin,” wika ni Santiago kahapon sa Philippine Sportswriters Association Forum sa conference hall ng Rizal Memorial Sports Complex.
Inaasahang muling magdodomina ang Blu Girls sa Thailand SEA Games na nakatakda sa Disyembre 9 hanggang 20.
Simula noong 1979 ay 11 gold medals na ang hinataw ng Blu Girls sa biennial event.
“That’s why we are so happy na nakabalik sa SEA Games ang softball. Our team is ready. Alam namin kung ano ang goal,” ani Santiago na sinamahan nina team captain Charlotte Sales (third base) at outfielder Roma Cruz.
Sina Sales at Cruz ay parehong first-timers sa SEA Games, ngunit pamilyar na sa sistema ni Santiago kasama ang 14 pang miyembro kabilang ang tatlong Fil-Americans na bahagi ng 2019 team.
“Malaking bagay ‘yung training camp namin (in Taiwan). Nakatulong sa teamwork, communication and ‘yung samahan,” wika ni Sales sa forum na inihandog ng San Miguel Corp., Philippine Sports Commission, Philippine Olympic Committee, MILO at 24/7 sports app ArenaPlus
Tinalo ng Blu Girls ang Indonesia para sa gold sa 2019 Manila SEAG at nakikita ni Santiago na papalagan sila ng Singapore.
“Sa tingin ko ngayon Singapore ang kalaban. Grabe ang preparation nila. They went to Australia, Japan and Taiwan,” sabi ni Santiago.
Unang lalabanan ng Blu Girls ang mga Singaporeans sa Disyembre 15 kasunod ang Malaysia sa Disyembre 16 at ang double-header sa Thailand at Indonesia sa Disyembre 17.
Nakatakda ang gold medal match sa Disyembre 20.