Pilipino Star Ngayon
August 14, 2025 | 12:00am
Bumaba ang tiwala ng mamamayan sa Philippine National Police (PNP) dahil sa masasamang ginagawa ng mga miyembro nito—nanghuhulidap, nangongotong, nagtatanim at nagre-recycle ng droga at ang katamaran na pawang pagpapalaki ng tiyan ang ginagawa sa malamig na station. Habang may nangyayaring krimen sa tabi ng presinto, patuloy ang pagtulog ng mga pulis. O kung hindi natutulog ay naglalaro ng game sa cell phone. Mas mahalaga ang pagsi-cell phone kaysa pagresponde sa krimen. Iyan ay sa kabila na mataas na ang suweldo ng mga pulis. Ang pinakamababang suweldo ng pulis ay P30,000 para sa patrolman. Pero sa kabila na mataas na ang suweldo, patuloy pa rin sa paggawa ng kabulastugan ang mga pulis.
Noong nakaraang Mayo, inatasan ni President Ferdinand Marcos Jr. ang Philippine National Police (PNP) at Department of Interior and Local Government (DILG) na rumesponde sa lugar ng krimen nang hindi lalampas sa limang minuto. Kailangang madaluhan agad ng pulisya ang mga binibiktima ng masasamang loob.
Bukod sa mabilis na pagresponde ng pulisya sa lugar ng krimen, ipinag-utos din niya na magkaroon ng mga pulis na nagpapatrulya sa kalye. Kailangan aniya na magkaroon ng police visibility. Kailangang may makitang pulis na naglalakad sa kalye. Ayon sa Presidente, kapag may nakikitang pulis sa kalye, nakadarama ang mamamayan na ligtas sila.
Para raw madaling makontak ang mga pulis, papalitan na ang mga number na 119, 911, 999 na nagdudulot ng kalituhan sa mamamayan. Ayon kay Marcos, pag-iisahin na lamang ang mga numerong tatawagan. Magpapatupad umano ang gobyerno ng single crisis hotline para sa emergency hotlines kapag may nangyaring krisis.
Noong Martes, sa 124th anniversary ng Police Service, muling inulit ni Marcos ang utos na dapat may sasagot sa emergency calls ng mamamayan gamit ang pinakabagong 911 response technology ng bansa. Sinabi ni Marcos na sa muling pagbuhay ng Emergency 911 Hotline ay nakakaresponde na ang kapulisan sa tawag mula sa police assistance hanggang sa police interventions gayundin sa search and rescue.
Mariing sinabi ng Presidente na umulan o umaraw, maging sa ordinaryong araw o panahon ng krisis ay dapat handang sumagot sa tawag ng publiko na humihingi ng tulong anumang oras at anumang panahon. Ayon sa Presidente, ito ang paraan para muling mabalik ang tiwala ng publiko sa kapulisan.
Aasahan ng mamamayan ang gagawing pagsisilbi at pagprotekta ng PNP. Aasahan ng mamamayan ang mabilis na responde. Huwag biguin ang tawag ng nangangailangan. Kapag nagawa ito, manunumbalik ang tiwala ng mamamayan.