August 16, 2025 | 12:00am
NAGKUKUMAHOG ngayon si Comelec Chairman George Garcia na magsagawa ng imbestigasyon sa mga pulitiko na lumusaw sa bilyun-bilyong budget para sa flood control project.
Hindi malilimutan ang mga sinabi ni President Ferdinand Marcos Jr., sa kanyang SONA noong Hulyo 28 kung saan pinasaringan niya ang mga mambabatas na nakinabang sa malaking pondo para sa flood control project. Mariing sinabi ni Marcos na “Mahiya naman kayo!”
Mainit na isyu ito ngayon para sa mga pulitikong kumutsaba sa pagwaldas ng pondo ng pamahalaan para maresolba ang pagbaha tuwing tag-ulan. Marahil nasaktan ang mga mambabatas sa ipinahayag ni PBBM. Personal na nakita ng Presidente ang mga proyektong palpak.
Pero napuna ko na mukhang kampante si PBBM sa pamamalakad ni Department of Public and Highways (DPWH) Secretary Manuel Bonoan kaya matibay ito sa kanyang puwesto. Ito ay sa kabila na may mga nangyayaring kapalpakan sa flood control project.
Palagay ko nararapat suspendihin ang lahat ng mga opisyales ng DPWH habang iniimbestigahan ang mga sangkot sa maanomalyang paggastos para sa flood control projects.
Pero tila bagyo si Bonoan kay PBBM at namamayagpag pa ito sa kanyang puwesto. Paano malalaman ang baho sa pagkalusaw ng pondo sa flood control project kung ang mga nag-iimbestiga ay mismong taga DPWH din.
May mga tinukoy na si PBBM na 15 private contractors na komopo nang bilyun-bilyong piso sa proyekto sa flood control project at lumalabas na mga kamag-anakan ng mga pulitiko ang contractors.
Kaya naman abalang-abala si Chairman Garcia at nag-iimbestiga na rin ang kanyang ahensiya kung sinu-sino ang mga pulitiko na nakipagkutsabahan sa mga contractor sa gumuhong flood control project.
Bakit ngayon lang kumilos Garcia sa pag-amoy sa baho ng mga pulitiko kaugnay sa nalusaw na budget para sa flood control project. Noon pa usapin na ang mga nawawalang pondo sa mga proyekto subalit hanggang ngayon ni isa ay wala man lang naikulong. Walang nabulok sa bilangguan.
Hindi na bulag ang mamamayan sa mga ganitong sistema sa pamahalaan. Marami sa mga politiko sa ngayon ay may kinaharap na kaso sa Sandiganbayan at Ombudsman.
Kung seryoso si Garcia sa kanyang banta laban sa mga pulitiko na nakinabang sa pondo, hindi na kailangang lumayo pa siya. Himukin niya si Baguio Mayor Benjamin Magalong at baka marami siyang makikilalang pulitiko na kasabwat ng mga moro-morong flood control projects.