August 18, 2025 | 12:00am
PATULOY pinapasok ng mga barkong China ang West Philippine Sea o Exclusive Economic Zone natin. Binubundol ang mga maliliit na sasakyan ng Philippine Navy, Coast Guard, at Bureau of Fisheries and Aquatic Resources. Inookupa ng kalaban at nagnanakaw ng isda sa Panatag (Scarborough), Escoda (Sabina), at Rozul (Iroquois) Shoals. Pinalalayas ang mga mangingisdang Pilipino.
Tuwing nambu-bully ang China mabilis sumisigaw ang mga propagandista nila na diplomasya lang ang isagot. Mga Pilipino sila pero hindi nila tinutuligsa ang pang-aabuso ng China. Misyon nila pahinain ang loob ng madla. Pinalalabas nila na masama ilantad ang pambubusabos ng China.
Linawin natin, nasa panig ng Pilipinas ang batas ng mundo. Lahat ng coastal states ay may 200-nautical miles EEZ, ayon sa UN Convention on the Law of the Sea. Meron ang China, Meron ang Pilipinas.
Hindi nagpapatong ang EEZs ng China at Pilipinas. May 350 milyang pagitan. Pero inaangkin ng China, hindi lang ang pagitan na yon ng South China Sea, pati 200 milya ng Pilipinas ay inaagaw.
‘Yan ang dahilan kaya pinasya ng Permanent Court of Arbitration nu’ng 2016 na mali ang China. Anang PCA, walang karapatan ang China angkinin ang high seas at EEZs ng ibang bansa.
Ayaw tanggapin ng China ang UNCLOS, maski pumirma siya rito. Ayaw din tanggapin ng China ang pasya ng PCA. Ang gusto niya manaig ang lakas ng armas. Dahil du’n napipilitan tuloy ang Pilipinas na mag-armas din bilang depensa.
Pasok naman ang mga propagandista ng China. Mali raw mag-armas ang Pilipinas. Mag-diplomasya na lang daw. Ibig nilang sabihin, isuko ng Pilipinas ang karapatan sa EEZ.
Ibig sabihin, ibigay natin ang EEZ natin sa China para walang gulo. Mga hunghang sila!