August 21, 2025 | 12:00am
HINDI makapaniwala si Apol sa narinig na pangalan ng babae. Totoo ba ang narinig niya o nagbibiro lang ang babae.
“Totoo ba Miss na Guava ang name mo?”
“Oo. Maria Guava ang real name ko.”
Napalunok ng laway si Apol. Naalala niya ang dalagitang naaktuhan niyang nagnanakaw ng bayabas sa kanyang bakuran. At ngayon, nasa harapan niya ang isang babaing ang pangalan ay “Guava”.
“Parang manghang-mangha ka Mr. Apol,’’ sabi ni Guava. “Parang hindi ka makapaniwala na may pangalang Guava.”
“Oo. Ngayon lang ako nakarinig ng name na Guava.”
Napangiti si Guava.
“E bakit ikaw Apol ang name hindi naman ako nagtataka—pareho tayo fruit.”
Napakamot si Apol sa ulo.
“Apolinario kasi ang name ko—Apol for short.”
“Ah kaya Apol.”
“Oo.”
“Huwag ka nang magtaka sa name ko Apol para lang katulad ito ng Strawberry, Cherry, Lemon at iba pa.”
Nagtawa si Apol. Mabiro pala si Guava.
“E anong itatawag ko sa’yo?” tanong ni Apol.
“Guava rin—gusto mo Bayabas.”
Napahagikgik si Apol. Okey pala si Guava.
“So kukunin mo na ang kuwarto, Guava?”
“Oo. Magde-deposit at mag-a-advance na ako.”
“Kailan mo balak lumipat?”
“Bukas.” (Itutuloy)