September 2, 2025 | 12:00am
MANILA, Philippines — Sumali na ang Cagayan de Oro upang i-kampanya ang hosting ng bansa ng 2025 FIVB Men’s World Volleyball Championship na magsisimula ngayong buwan sa Maynila.
Bahagi ang Cagayan de Oro City sa three-city tour na may temang “Set Na Natin ‘To Trophy and Mascot Tour.”
Ginanap ito sa SM Downtown CDO.
Kasama sa programa sina Alas Pilipinas pool member Elijah Kim at dating volleyball player Dylan Ytorralde na ngayon ay aktor na at naging PBB Housemate.
Nasilayan din sa event ang mascots na sina Hataw at Koolog.
“We’re 12 days to Day 1 and we appreciate the warm and raucous reception for the world championship in these three-city tour,” ani Ramon “Tats” Suzara na president ng Philippine National Volleyball Federation at Asian Volleyball Confederation.
Kasama rin sa event sina PNVF Mindanao Charter Member Alexander Adeva, head ng region’s volleyball association; Cagayan de Oro City Sports Office OIC Abby Cris Waga na kinatawan ni Mayor Rolando “Klarex” Uy; at Department of Tourism Region 10 director Marie Elaine Unchuan kasama sina John Baclig, JM Delvo at Elvie Mae Amay, at sina SM Downtown CDO mall manager Paolo V Zulueta at mall marketing manager Bambi Ochavo-Ditona.
Nagsimula ang ‘trophy and mascot tour’ sa SM Seaside sa Cebu City at dumayo rin sa Laoag City bago magtungo sa Cagayan de Oro.
Ang world championship ay nakatakdang magsimula sa Setyembre 12 sa SM Mall of Asia Arena.