September 13, 2025 | 12:00am
HABANG lumalalim ang imbestigasyon sa pagnanakaw ng pondo para sa flood control project, napipigurahan na ang mga mukha ng mga ganid na nagkamal ng bilyun-bilyong piso. Sa testimonya nina Engr. Brice Ericson Hernandez at mag-asawang contractor Curlee at Sarah Discaya, sinabi ng mga ito ang mga senador at kongresista na kumamal ng milyun-milyong piso sa flood control project.
Nag-iba ang liderato ng Senado nang maupo si Sen. Tito Sotto kapalit ni Chiz Escudero bilang Senate President. Ang Blue Ribbon Committee na hawak ni Sen. Rodante Marcoleta ay si Sen. Panfilo Lacson na ang namumuno.
Kaya naging mainit ang balitaktakan ng mga senador matapos pagtalunan ang kostudiya kay Hernandez. Sa huli napunta sa Pasay City jail si Hernandez, Ayon sa nasagap ko, natakot si Hernandez na malagay sa panganib ang kanyang buhay dahil ang tinumbok niya sina Senators Jinggoy Estrada at Joel Villanueva.
Ayon kay Hernandez, tumabo ng milyun-milyong piso sina Jinggoy at Villanueva na pinasinungalingan naman. Sabi pa nina Estrada at Villanueva na ginigiba lamang sila.
Si Curlee Discaya naman, sinabi nito ang mga kongresista na nagkamal nang malaking pera na umaabot sa 30 percent bawat proyekto. Sinabi ni Curlee na kakarampot na lamang ang napupunta sa kanilang bulsa at kung minsan pa umano ay lugi sila sa proyekto.
Kailangan daw nilang tanggapin upang hindi sila mapabilang sa iba-ban sa mga proyekto ng DPWH. Maraming napaismid at tumaas ang kilay sa sinabi ni Curlee.
Mas matindi pa raw flood control project kaysa sa PDAF scam ni Janet Napoles. May mga pulitiko rin na nasangkot sa PDAF scam pero naabsuwelto sila at tanging si Napoles lamang ang nakulong. Walang datung na nabawi kay Napoles.
Ngayon ay maraming kongresista at senador ang sangkot sa flood control. Patuloy ang mamayagpag ng mga magnanakaw sa pondo ng bayan na ang nagpapakahirap ay mga Pilipinong taxpayers. Pera ng taumbayan ang ninakaw. Napakaraming pera!
Kaya ang panawagan ko, pangalanan na ang mga kasabwat sa anomalya at bawiin nang tuluyan ang mga kayamanan ng mga ito. Kapag nagpalit ang administrasyon makakatakas na naman ang mga magnanakaw.