October 5, 2025 | 12:00am
MANILA, Philippines — Puntirya ng College of Saint Benilde na sikwatin ang pangalawang sunod na panalo pagharap sa University of Perpetual Help System Dalta sa 2025 Shakey’s Super League (SSL) Preseason Unity Cup na lalaruin sa Paco Arena ngayong araw.
Magsisimula ang kanilang paluan sa alas-10 ng umaga, sunod ang bakbakan sa pagitan ng Emilio Aguinaldo College at Lyceum of the Philippines sa alas-12 ng tanghali.
Galing sa impresibong panalo ang Lady Blazers kung saan tinalo nila ang San Sebastian College-Recoletos, 25-17, 25-20, 25-18 noong Biyernes para ilista ang 1-0 karta at saluhan sa tuktok ng Pool D ang Ateneo de Manila University.
Inaasahang mapapalaban ang four-time NCAA champion, CSB dahil nais ng Lady Altas na bumangon agad mula sa pagkakadapa kontra Blue Eagles sa event na katuwang ang Shakey’s Pizza Parlor, Peri-Peri Charcoal Chicken, Potato Corner at R and B Milk Tea.
Samantala, magtatapat sa pangatlong laro ang Jose Rizal University at Adamson University sa alas-2 ng hapon.