October 14, 2025 | 12:00am
MANILA, Philippines — Pinurnada ng PLDT ang opisyal na Premier Volleyball League (PVL) debut ni No. 1 overall pick Bela Belen matapos talunin ang Capital1 Solar Energy, 25-22, 25-20, 25-23, sa 2025 Reinforced Conference kahapon sa Smart Araneta Coliseum.
Pumalo si Fil-Canadian Savi Davison ng 22 points mula sa 15 attacks at pitong blocks at may 15 markers si Russian import Anastasia Bavykina para sa 1-0 baraha ng High Speed Hitters sa Pool A.
“Nagka-align siya sa team namin na iyong mga kulang namin siya ang nagpupuno,” pahayag ni coach Rald Ricafort kay Bavykina. “Hopefully, with the chemistry makapag-jell pa kami.”
May 10 excellent receptions din ang Russian reinforcement para sa kanyang depensa para sa 14-game winning streak ng 2025 PVL On Tour at Invitational Conference champions.
Ito ang ikatlong pinakamahabang arangkada ng isang koponan sa PVL history, matapos ang kinamanadang 19-game run ng Creamline mula noong 2023 hanggang 2024 at 2024 hanggang 2025.
“I think the biggest thing right now is to support her. It’s her first game, obviously, she’s really good, she knows what to do,” sabi ni Davison kay Bavykina.
Humataw si Kim Kianna Dy ng 10 points at nagsumite si setter Kim Fajardo ng 17 excellent sets habang may 14 excellent dig si libero Kath Arado.
Kumana naman si Belen ng 13 markers sa panig ng Solar Spikers na nakahugot kay Ukrainian import Oleksandra Bytsenko ng 20 points mula sa 17 attacks, dalawang aces at isang block.
Gamit ang kanilang eksperyensa, nakuha ng PLDT ang 2-0 bentahe sa laro bago tuluyang selyuhan ang panalo sa Capital1 ni Alas Pilipinas coach Jorge Souza de Brito.