Pilipino Star Ngayon
October 20, 2025 | 4:08pm
MANAMA, Bahrain — Swak si Pinay bet Kram Airam Carpio sa semifinals ng pencak silat event, habang wagi ang Alas Pilipinas U-18 sa girls volleyball sa Asian Youth Games Lunes dito.
Tinalo ni Carpio ng Santa Cruz, Laguna si Sakshi ng India sa girls’ 51-55kg papasok sa semis sa Exhibition World Bahrain Hall One sa Sakhir.
Nauna nang nanalo ang silver medalist sa Tanding Class A ng Asian Pencak Silat noong Hulyo sa Ha Tinh Province, Vietnam kay Nazninfatemeh Kolasangiani ng Iran sa Round of 16.
Tinakasan naman ng Alas Pilipinas U18 ang South Korea, 25-21, 19-25, 25-22, 22-25, 15-10, sa girls’ volleyball sa Isa?Sports?City sa Riffa.
Binanderahan ni National University transferee Samantha Cantada ang Philippine National Volleyball Federation (PNVF) Under-18 champions.
Nakatuwang ni Cantada sina Rhose Almendralejo at Harlyn Serneche.
Lalabanan ng mga Pinay spikers ang Southeast Asian rival Thailand sa Pool D play ngayong araw.
Samantala, bigo si Jelou Eluna kay Muhammad Raqib Darwisy ng Malaysia, 13-40, sa boys’ 59-63kg quarterfinals ng pencak silat.
Sa Kurash, minalas si Syrine Mae Bacani sa semifinals spt sa girls’ -70kg quarterfinals matapos yumukod kay Mahsa Barzegar ng Iran via khalol.
Sibak din si Elijah Mendoza sa boys’-65kg Round of 16 matapos matalo kay Bubakr Turaev ng Taijikistan via khalol.