November 20, 2025 | 12:00am
MANILA, Philippines — Isinama ng Philippine Olympic Committee (POC) sina professional boxers Eumir Felix Marcial at Weljon Mindoro sa men’s national boxing team na susuntok sa 33rd Southeast Asian Games sa susunod na buwan sa Bangkok, Thailand.
Dahil dito ay kumpiyansa si POC president Abraham Tolentino na makakapag-uwi ng gold medal sina Marcial at Mindoro.
“It gives us the opportunity for a podium finish in boxing, but of course we want the gold. This is for the country,” wika ni Tolentino kahapon.
Sasalang si Marcial, isang four-time SEA Games gold winner, sa men’s 80 kgs class, habang kakampanya ang 25-anyos na si Mindoro (15-0-1, 15 knockouts) sa men’s 75 kgs.
Umiskor si Marcial sa isang majority decision win kay Eddy Colmenares noong Oktubre 28 sa Thrilla in Manila 2 sa Araneta Coliseum para sa kanyang 7-0-0 (5 KOs) card.
Sinabi ni Association of Boxing Alliances in the Philippines (ABAP) Secretary-General Marcus Jarwin Manalo na pinayagan ang national men’s boxing team na lumahok sa pito sa siyam na weight classes sa Thailand SEA Games.
Makakasama nina Marcial at Mindoro sa tropa sina Jay Bryan Barquarto (48 kgs), Marvin Tabamo (51 kgs), Flint Jara (54 kgs), Ian Clark Bautista (57 kgs) at Junmilardo Ogayre (60 kgs).
Ang women’s team ay binubuo nina Ofelia Magno (48 kgs), Olympics bronze medalist Aira Villegas (50 kgs), Risa Pasuit (57 kgs), Tokyo silver medalist Nesthy Petecio (60 kgs) at Paris Olympian Hergie Bacyadan (70 kgs).
Maliban kina Marcial at Mindoro, nasa isang two-week training camp na ang mga national boxers sa Muak Lek, Thailand.