November 21, 2025 | 12:00am
MANILA, Philippines — Pinatibay ng Farm Fresh ang tsansa sa No. 1 spot sa knockout quarterfinals ng 2025 Premier Volleyball League (PVL) Reinforced Conference matapos walisin ang sibak nang Chery Tiggo, 25-17, 25-23, 29-27, kahapon sa MOA Arena sa Pasay City.
Pumalo si Belgian import Eli Rousseaux ng 20 points sa likod ng 17 attacks at tatlong blocks at nagdagdag sina Ces Molina at Trisha Tubu ng 14 at 13 markers, ayon sa pagkakasunod.
“I told my team before the game I hope it’s gonna be a tough game because we need those. We need to work hard and keep preparing for next week which will be of course, the decisive matches,” ani Italian coach Alessandro Lodi sa Foxies.
Tumipa si Fil-Am setter Alohi Robins-Hardy ng 24 excellent sets.
Nakatabla sa ZUS Coffee sa pareho nilang 7-1 kartada, nakuha ng Farm Fresh ang No. 1 seat dahil sa mas mataas na match point, 21-20, matapos ilista ang ikaapat na sunod na panalo.
Makakamit ng Foxies ang top seed kung matatalo ang PLDT High Speed Hitters (6-1) sa Petro Gazz Angels (4-3) sa huling laro kagabi.
Sa unang laro, tinakasan ng Capital1 Solar Energy ang talsik nang Galeries Tower, 12-25, 29-27, 25-19, 25-18, para pagandahin ang puwesto sa quarterfinals.
Bumira si Ukrainian import Sasha Bytsenko ng 35 points mula sa 33 attacks, isang service ace at isang block at nagdagdag si No. 1 overall pick Bella Belen ng 14 markers at 15 excellent digs.
Tumabla ang Solar Spikers sa Akari Chargers sa 4-4 marka para sa No. 8 spot, ngunit umangat ang tropa ni coach Jorge Souza de Brito sa No. 7 dahil sa match points, 13–12.
Tataas pa ang Capital1 sa No. 6 kung tatalunin ng PLDT (6-1) ang Petro Gazz (4-3) sa huling laro kagabi.