November 23, 2025 | 12:00am
MANILA, Philippines — Excited na sina dating World Juniors Championships campaigners Micaela Jasmine Mojdeh at Heather White sa pagsabak sa 2025 Southeast Asian Games na idaraos sa susunod na buwan sa Bangkok, Thailand.
Parehong magde-debut sina Mojdeh at White sa SEA Games kaya’t hindi maitago ng dalawa ang saya na maging bahagi ng Team Philippines na raratsada sa biennial meet.
Nasa University of Southern California sa Los Angeles, California si Mojdeh habang nasa Duke University sa North Carolina naman ang Filipino-British na si White.
Nakapasok sina Mojdeh at White sa SEA Games matapos magkwalipika sa isinagawang tryout ng Philippine Aquatics Inc. noong Agosto sa Rizal Memorial Swimming Pool.
Sa Thailand SEA Games, sasabak si Mojdeh sa tatlong individual events at isang relay event.
Magtatangkang humirit ng medalya si Mojdeh sa 200m breststroke, 100m butterfly at 200m butterfly habang bahagi rin ito ng 4x100medley relay team.
Sa kabilang banda, hahataw si White sa limang events — tatlo sa individual at dalawa sa relay.
Masisilayan ito sa 50m freestyle, 100m freestyle at 200m freestyle habang kasama ito sa 4x100m freestyle relay at 4x200m freestyle relay.
Aminado ang dalawa ng matidning laban ang kanilang haharapin sa Thaialnd SEA Games.
Ngunit magandang pagkakataon ito upang makakuha ng karanasan para sa mga susunod na edisyon ng biennial meet partikular na sa 2027 SEA Games na idaraos sa Malaysia.
Nakatakdang bumalik sa Pilipinas sina Mojdeh at White para makasama ang delegasyon na tutulak sa Bangkok.