Altas kasado na sa semis


Russell Cadayona — Pilipino Star Ngayon

November 28, 2025 | 12:00am

MANILA, Philippines — Sinuwag ng Group A No. 1 University of Perpe­tual Help System DALTA ang Final Four ticket matapos sibakin ang Group B No. 3 Jose Rizal University, 81-74, sa quarterfinals ng NCAA Season 101 men’s basketball tournament kahapon sa MOA Arena sa Pasay City.

Kumamada si Mark Gojo Cruz ng 23 points, habang kumolekta si Patrick Sleat ng 14 points, 10 assists at 6 rebounds para sa unang semifinals appearance ng Altas matapos noong Season 97.

Lalabanan ng tropa ni coach Olsen Racela sa best-of-three semis series ang mananalo sa ‘do-or-die’ game ng Group A No. 2 Arellano Chiefs at Group B No. 3 Letran Knights nga­yong alas-2:30 ng hapon.

“One more of belief, natalo kami doon sa parehong teams,” ani Racela. “Talo kami sa Arellano last game, we lost to Letran in the elimination. So one is to belief that they can beat these two teams.”

Pinamunuan ni Sean Salvador ang Heavy Bombers sa kanyang 18 points.

Samantala, umabante rin sa Final Four ang Group B top seed San Beda University mula sa 91-67 paggupo sa Lyceum of the Philippine University.

Sasagupain ng Red Lions sa semis ang mana­nalo sa ‘sudden death’ ng nagdedepensang Mapua Cardinals at St. Benilde Blazers.