January 22, 2026 | 12:00am
“Hi Vince!”’ bati ni Marie na noon ay nagdidilig ng mga halaman.
“Hi Marie! Good morning!”
“Good morning. Ang aga mong magising.”
“Oo, alas singko pa lang gising na ako. Nakasanayan ko na. Pagkatapos kong magluto ay ang pagwawalis naman ng bakuran—daming laglag na dahon.”
“Oo nga dito rin sa bakuran namin maraming laglag na dahon.”
“Dun kasi galing sa punong duhat na yun ang mga dahon. Noon pa ni-request na ipaputol ang puno pero hindi pa ginagawa.”
“Kaninong duhat ba yun?”
“Dati na raw yan, bago pa itinayo ang subdibisyon. Hindi maputul-putol dahil marami raw magbunga.”
“Ah.”
“Bakit ikaw ang nagdidilig, Marie?”
“Wala si John —nasa malayo ang destino. Baka isang buwan dun.”
“Ah.”
“Architect kasi si John—laging ang project ay sa malayo. Karaniwang ang tinatayo ay mga fastfood chain.”
“Ah.”
“Nung nakaraang buwan, nasa La Union siya.”
“Siya siguro ang nagde-design ng mga gusali?”
“Oo. Marami silang project.”
“Kaya pala ikaw ang gumagawa.”
“Oo. Mahirap kapag wala siya.”
“E bakit hindi ka sumama sa kanya—sa destino niya?”
“Mahirap! Ayoko.”
Hindi na nagtanong si Vince. (Itutuloy)