February 18, 2026 | 12:00am
Dear Dr. Love,
Magandang araw po. Ako po si Kaye. Isa po akong misis na aminadong selosa, pero sana po ay maintindihan ninyo ang pinanggagalingan ko.
Nitong mga nakaraang linggo, madalas umuwi ng gabi ang mister ko dahil daw sa sunod-sunod na business meetings. Naiintindihan ko naman na kailangan iyon sa trabaho niya.
Pero isang gabi, may nag-send sa akin ng litrato—nakaupo siya sa isang restaurant kasama ang isang babaeng maayos manamit at mukhang kaedad niya.
Ang sabi ng nag-send, “Date yata ng mister mo.”Hindi ko na po napigilan ang sarili ko. Pag-uwi niya, hindi ko siya pinansin.
Kinabukasan, inusisa ko siya at inamin niyang may meeting nga raw sila ng isang potential client at babae nga ito. Trabaho lang daw.
Dr. Love, gusto ko siyang paniwalaan pero bakit parang ang sakit pa rin?
Normal lang ba ang nararamdaman ko? Paano ko ba haharapin ang ganitong sitwasyon nang hindi nasisira ang tiwala namin sa isa’t isa?
Kaye
Dear Kaye,
Ang selos ay hindi agad kasalanan. Iyan ay emosyon na kadalasang bunga ng takot—na baka maagaw, takot na baka mapalitan, takot na baka masaktan.
Pero tandaan mo, hindi lahat ng babaeng kasama ng mister mo ay kaagaw mo.
May mga pagkakataon na ang babae ay kliyente, katrabaho, o bahagi lamang ng res-ponsibilidad niya sa trabaho.
Bago ka maghinala, kausapin mo muna siya nang mahinahon. Huwag galit ang pairalin, kundi pag-unawa.
Sabihin mo kung ano ang naramdaman mo nang makita mo ang litrato. Hindi para mag-akusa, kundi para magpaliwanag ng iyong damdamin.
Sa isang banda, hindi dapat basta paniwalaan ang mga bagay na pinadala ng kung sino man. Dahil maaaring may intensiyong hindi maganda sa iyong asawa o sa inyong pagsasama ang taong ‘yun.
At para naman kay mister, kung mahal ka niya, dapat handa siyang magbigay ng assurance.
Transparency ang susi—ipaalam ang schedule, ipakilala ang mga ka-meeting kung maaari, at iparamdam na ikaw pa rin ang prayoridad.
Ang tiwala ay parang salamin—kapag nabasag, mahirap buuin. Kaya habang maaga pa, ayusin ninyo sa pamamagitan ng bukas na komunikasyon.
Sa pag-ibig, hindi kalaban ang selos—pero dapat itong kontrolin ng tiwala at respeto.
DR. LOVE