MANILA, Philippines — Ang pagsolo sa liderato ang misyon ng University of Perpetual Help System DALTA sa pagsagupa sa Lyceum of the Philippines University sa NCAA Season 100 juniors basketball tournament bukas sa FilOil EcoOil Centre sa San Juan City.
Target ng Junior Altas ni head coach Joph Cleopas ang back-to-back wins para maitaas ang kanilang baraha sa 4-1.
Kasosyo ng Junior Altas sa top spot ang San Beda Red Cubs at EAC Brigadiers sa 3-1 marka.
May 0-4 baraha naman ang Junior Pirates.
“I told them na huwag maging complacent kasi every game is important,” wika ni Cleopas sa kanyang mga bataan.
Nagmula ang Junior Altas sa 92-80 pagdomina sa Arellano Braves.
Minalas naman ang Junior Pirates sa San Sebastian Staglets, 77-83, sa huli nilang mga laro.
Muling sasandig ang Junior Altas kina 6-foot-7 Lebron Jhames Daep, Jan Roluna, Jericho Cristino, JD Pagulayan, Icee Callangan, Loiue Ramirez, Aries Borja at Kelsey Baldoria.