MANILA, Philippines — Babanderahan nina Sisi Rondina at Bernadeth Pons ang kampanya ng Pilipinas sa Volleyball World Beach Pro Tour Futures Nuvali na hahataw ngayon sa City of Santa Rosa, Laguna.
Muling magtatambal ang tinaguriang ‘SiPons” sa pagsabak ng Alas Pilipinas sa torneong lalahukan ng 19 bansa kabilang ang US, Germany, Latvia, the Netherlands, Israel, Australia, New Zealand, Canada at Italy.
Maliban kina Rondina at Pons, tututukan din sina Khylem Progella at Sofia Pagara ng University of Santo Tomas sa torneong sasalihan din ng Czechia, Greece, Lithuania, Finland, Hungary, Romania, Slovakia, Vanuatu, Israel at Japan.
Itatampok din ng Alas Pilipinas si Sunnie Kalani Villapando na muling makakatambal si Jen Gaviola ng Coast Guard.
Papalo rin sina UAAP champions Honey Grace Cordero at Kat Epa ng NU at sina Alexa Polidario at Dij Rodriguez sa torneong inorganisa ng Philippine National Volleyball Federation na pinamununuan ni president Ramon “Tats” Suzara na pangulo rin ng Asian Volleyball Confederation at executive vice president ng world volleyball governing body FIVB.
Hahataw din sa men’s division sina Alas Pilipinas tandem Jude Garcia at Jaron Requinton at sina Lerry John Francisco at Edwin Tolentino.