NEW YORK — Kumolekta si Jalen Brunson ng 39 points at 12 assists para igiya ang Knicks sa 121-113 paggupo sa nagdedepensang Boston Celtics sa Game 4 at kunin ang 3-1 abante sa kanilang Eastern Conference semifinals showdown.
Nagdagdag sina Mikal Bridges at Karl-Anthony Towns ng tig-23 points at may 20 markers si OG Anunoby.
Isang panalo na lang ang kailangan ng New York para sa kanilang unang conference finals sa nakaraang 25 taon.
“I think it was a sense of urgency, desperation, just knowing that we have a great opportunity,” ani Brunson na kumamada ng 18 points sa third period.
Nagkaroon si Boston star Jayson Tatum ng right leg injury sa huling 2:58 minuto ng fourth quarter at isinakay sa wheelchair papunta sa ospital.
Tumapos si Tatum na may 42 points para sa Celtics habang may 23 markers si Derrick White tampok ang anim na three-pointers kasunod ang 20 points ni Jaylen Brown.
Sa San Francisco, nagbagsak si Anthony Edwards ng 30 points at may 31 markers si Julius Randle sa 117-110 panalo ng Minnesota Timberwolves sa Golden State Warriors sa Game 4 para sa 3-1 lead sa kanilang Western Conference semifinals series.
May pagkakataon ang Timberwolves, nakahugot kay Jaden McDaniels ng 10 points at 13 rebounds, na sibakin ang Warriors sa Game 5 na gagawin sa Minneapolis bukas papasok sa conference finals.