MANILA, Philippines — Pupuntiryahin ng University of Perpetual Help System DALTA ang korona ng NCAA Season 100 boys volleyball tournament sa pagsagupa sa Letran sa Game Two sa FilOil EcoOil Centre sa San Juan City.
Humataw ang Altas Spikers ng 25-21, 29-27, 28-26 panalo sa Game One ng kanilang best-of-three championship series ng Squires.
Bumira si John Lat ng 15 points mula sa 10 attacks at limang blocks para banderahan ang Perpetual.
Nag-ambag naman si Zyro Ornos ng 13 markers habang may 12 points si Nathan Ciriaco para sa tropa ni coach Sandy Rieta katuwang sina assistant coaches Jason Sapin at Chi cha Bautista.
Hangad ng Las Piñas ang kanilang ika-13 korona.
Sasandalan ulit ni Rieta sina Ciriaco, Ornos, Resty Santos, Charles Concina, Kirby Alecida, Miguel Dela Cruz at Michael Medina.
Muli namang aasahan ng Letran sina King Nimo, Vergel Balajadia at Jasper Algao sa hangaring makatabla at makahirit ng deciding Game Three.