MANILA, Philippines — Inangkin ni Pinay jiu-jitsu sensation Aleia Aielle M. Aguilar ang gold medal sa Pan Kids IBJJF Jiu-Jitsu Championship 2025 sa Silver Spur Arena sa Osceola Heritage Park sa Kissimmee, Florida.
Tinalo ng 7-anyos na si Aguilar ng Six Blades Jiu-Jitsu si Lyla Rose Warren ng Shark BJJ sa kanilang Pee Wee 2 grey finals match.
“She is not afraid to compete at the global stage at her incredibly young age. I am really proud of her,” sabi ng kanyang amang si Alvin Aguilar, ang founding father ng Filipino mixed martial arts na Universal Reality Combat Championship (URCC) at DEFTAC.
Papasok sa championship round ay sinapawan ni Aielle, ang three-time jiu-jitsu world champion sa Abu Dhabi Jiu-Jitsu Pro (AJP), si Trinity Grace Thome ng Gracie Barra sa quarterfinal round ng under 46.60 pounds division.
Tinalo naman niya sa semifinals si Maite Almeida De Oliveira ng Carlson Gracie Team para labanan sa gold medal round si Warren.
Nakuntento si Warren sa silver, habang may bronze sina De Oliveira at Slade ReShae ng Alliance.