October 21, 2025 | 12:00am
MANILA, Philippines — Mapapalaban ang Alas Pilipinas sa indoor volleyball ng 2025 Southeast Asian Games na gaganapin sa Disyembre sa Bangkok, Thailand.
Sa women’s division, kasama ng Alas Pilipinas ang powerhouse Thailand sa Group A gayundin ang Singapore.
Nasa Group B naman ang Vietnam, Indonesia, Myanmar at Malaysia.
Kailangan lamang talunin ng Alas Pilipinas ang Singapore para makasiguro ng tiket sa crossover semifinals kung saan inaasahang makakaharap naman nito ang Vietnam.
Ang Top 2 team sa bawat grupo ang aabante sa semis.
Sa men’s division, nasa Group B ang Alas Pilipinas kasama ang Indonesia, Cambodia at Myanmar.
pasok sa Group A ang Thailand, Vietnam, Singapore at Laos.
Ang dalawang mangungunang teams din ang papasok sa crossover semis.
Babanderahan ni outside hitter Bryan Bagunas ang Alas Pilipinas kasama sina outside hitter Marck Espejo, opposite spiker Leo Ordiales, playmaker Owa Retamar at libero Josh Ybanez.
Maliban sa indoor volleyball, target din ng Alas Pilipinas na makahirit ng medalya sa beach volleyball.
Pangungunahan ang Alas Pilipinas sa beach volleyball nina veteran tandem Sisi Rondina at Bernadeth Pons na puspusan na ang paghahanda para masigurong makapasok ito sa podium sa Thailand SEA Games.
Lalaruin ang indoor volleyball mula Disyembre 10 hanggang 19 habang ang beach volleyball naman ay lalarga mula Disyembre 12 hanggang 19.