Pilipino Star Ngayon
November 16, 2025 | 5:49pm
MANILA, Philippines — Sasabak ang Alas Pilipinas men’s team sa isang two-week training camp sa Taiwan para paghandaan ang paparating na 33rd Southeast Asian Games sa Thailand sa Disyembre.
Ang parehong tropang gumawa ng kasaysayan sa FIVB Volleyball Men’s World Championship noong Setyembre ang ilalaban ng Philippine National Volleyball Federation (PNVF).
“We’re going to prepare well for the SEA Games and we really need to train together since we came from a long break, too,” ani Marck Espejo sa Alas Men na nagtapos sa 19th place sa hanay ng 32 teams sa nakaraang World Championships.
Kasalukuyan namang nasa Japan si team captain Bryan Bagunas kung saan siya naglalaro para sa Osaka Bluteon sa SV.League.
Sa kanilang pagsalang sa Kaohsiung training camp ay lalabanan din ng mga Pinoy spikers ang mga powerhouse Taiwanese squads.
Muling gagabayan ni Italian coach Angiolino Frigoni ang tropang kinabibilangan din nina Owa Retamar, Leo Ordiales, Josh Ybañez, Kim Malabunga, Peng Taguibolos, Louie Ramirez, Lloyd Josafat, Buds Buddin, Vince Lorenzo, Eco Adajar at Jade Disquitado.
Idinagdag ni PNVF president Ramon “Tats” Suzara na maglalaro rin sina University of Santo Tomas standouts Al-Bukarie Sali at JJ Macam pati na si Lucca Mamone.
Huling umabot sa SEA Games podium ang Alas Men noong 2019 nang makamit ang silver medal matapos matalo sa Indonesia sa finals sa pamumuno nina Bagunas, Espejo, Malabunga at Retamar.
Samantala, hindi pa rin mabuo ang Alas Pilipinas women’s squad para sa kanilang preparasyon sa Thailand SEA Games.
Tanging sina team captain Jia de Guzman, Eya Laure, Vanessa Gandler, Dawn Macandili-Catindig at Jen Nierva ang nag-eensayo para sa koponan ni Brazilian coach Jorge Edson Souza de Brito sa Gameville sa Mandaluyong City.
Umaasa ang PNVF na magkakaroon ang mga Pinay hitters ng isang three-week training.
Ang 20-member pool ay magmumula sa professional women’s league at mga top collegiate schools.