MANILA, Philippines — Pipilitin ng Alas Pilipinas na makatsamba sa host Vietnam sa kanilang pagtutuos sa Leg 2 ng 2025 SEA V.League sa Ninh Bình Gymnasium.
Magkikita ang dalawang koponan ngayong alas-8 ng gabi.
Bigo ang mga Pinay sa mga Vietnamese hitters, 13-25, 21-25, 25-23, 9-25, sa Leg 1 kung saan bumida sina Eya Laure, Vanie Gandler, Dell Palomata at Justine Jazareno para maagaw ang third set.
Sasandigan din ng Alas Pilipinas sina Leg 1 Best Outside Spiker awardee Angel Canino, team captain Jia De Guzman, Bella Belen, Shaina Nitura, Leila Cruz, Maddie Madayag, Mars Alba, Fifi Sharma, Thea Gagate, Dawn Catindig at Cla Loresco.
“We are on the way. We are working hard and building a winning culture,” sabi ni Brazilian coach Jorge Souza de Brito sa Nationals na humataw ng bronze medal sa Leg 1 matapos gibain ang Indonesia, 25-20, 25-20, 16-25, 25-13, sa Nakhon Ratchasima, Thailand.
Bukod sa Vietnam ay minalas din ang Alas Pilipinas sa Thailand, 25-17, 24-26, 20-25, 20-25, sa Leg 1.