MANILA, Philippines — Hindi na pinakawalan ng Capital1 Solar Energy ang isang three-time UAAP Most Valuable Player.
Pinili ng Solar Spikers si Bella Belen bilang No. 1 overall pick ng 2025 Premier Volleyball League (PVL) Rookie Draft kahapon sa Novotel Hotel sa Cubao, Quezon City.
Ang National University Lady Bulldogs star ang inaasahang magiging sentro ng lakas ng Capital1 na hahawakan ni Brazilian Olympic at Alas Pilipinas coach Jorge Souza de Brito.
Kasalukuyang magkasama sina Belen at de Brito sa pagsabak ng Alas Pilipinas sa 2025 AVC Women’s Nations Cup sa Hanoi, Vietnam.
Sa ilalim ni dating mentor Roger Gorayeb, hinirang na team consultant, ay nagposte ang Solar Spikers ng 7-24 win-loss record sa nakaraang tatlong PVL conferences.
Dati nang naglaro ang 5-foot-8 na si Belen sa PVL para sa BaliPure Purest Water Defenders bilang guest player kasama sina NUNS Lady Bullpups teammate Alyssa Solomon noong 2018 Reinforced Conference.
Samantala, pinili ng Galeries Tower si Jean Asis bilang No. 2 overall pick kasunod sina No. 3 Alohi Robins-Hardy (Farm Fresh), No. 4 Lyann De Guzman (Nxled), No. 5 Alexis Ciarra Miner (ZUS Coffee), No. 6 Erin Pangilinan (Cignal HD), No. 7 Tia Joy Andaya (Choco Mucho) at No. 8 Baby Jyn Soreño (Chery Tiggo).
Papalo ang 2025 PVL Reinforced Conference sa Setyembre.